Sunday, November 30, 2008

香煎鯪魚餅

香煎鯪魚餅係順德名菜,身為順德人點會唔識整鯪魚餅呢?上環新記有對手啦...如果我成功嘅話...哈哈哈!因我一向鐘意買新記鯪魚肉嚟煎魚餅或者整生菜鯪魚肉, 一斤鯪魚肉要$70,貴就貴咗D但係D鯪魚肉又鬆又彈牙而且唔會有骨, 同魚檔用機攪個D差好遠。不過睇咗蘇Good好似唔係太難, 一於學吓自家製,以後多個選擇都好。第一次自家製嘅香煎鯪魚餅出場啦, 個樣同味道都合格, 愛人當然話好味!


剁鯪魚肉嘅小Tips:
1) 鯪魚多骨, 所以一定要先切薄片, 將骨切碎才剁, 鯪魚餅就唔會有骨。
2) 要放少少鹽係鯪魚片中先剁, 咁樣更易起膠, 剁兩下鯪魚膠就自然會黐刀。
3) 調味後逐少加水, 大概加1/4飯碗水就夠。加水後魚肉會散開, 你要努力攪至起膠, 又再加水, 魚肉又再次散開, 如是者加完D水。咁樣魚餅就會又鬆又彈牙家啦!

材料:
鯪魚1條 (鯪魚連皮起肉, 只要魚柳)
芫茜(切細粒)
蔥(切細粒)
調味料:
生抽、麻油、油、糖、胡椒粉、生粉少許、水1/4碗水

Friday, November 28, 2008

Hot Pot on Thanksgiving Day

今晚跌至13﹣14度愛人提議打邊爐,我即刻和議~正!開始咗食先記得影相,好彩愛人未將D食物嚟個『一煱熟』,哈哈。。。唔知點解男人咁無耐性。今晚之星係citysuper嘅『美國大蜆』同『荷蘭豬腩肉』,勁好味。當然唔少得豆腐,蘿蔔,蜀米,本地牛肉, 墨魚丸等等...美酒佳倄今晚食得好飽阿 :P









Saturday, November 22, 2008

蕃茄薯仔通心粉

將剩底嘅 Landing Soup 做早餐: 蕃茄薯仔通心粉, 一湯2種食法, 唔好浪費食物呀!



Friday, November 21, 2008

Landing Soup: 蕃茄薯仔排骨湯

飛咗十幾個鐘, 口乾, 鼻乾, 皮膚乾, 總之成個人好乾, 最好就係飲個湯保保水。今次我為愛人㷛咗個『蕃茄薯仔排骨湯』, 係快靚正之選, 超簡單, 全部材料超市有售, 材料包括:蕃茄,薯仔,紅蘿蔔,洋蔥及排骨,我用咗愛人最 like 嘅軟骨嚟㷛。明火㷛1個鐘, 然後放入真空煲, 明早愛人就有保水靚湯飲啦!



Thursday, November 20, 2008

香草煎羊架

記得Maslow嘅Hierarchy of Needs, 食飽係人類最低層嘅需要, 咁係唔係食咩都唔重要, 只要食飽就得呢?同事同我講: 係香港人都餐餐茶餐廳家啦, 食咩都係差唔多啦!明明『生存』同『生活』係唔一樣, 食咩理應有所分別, 唔單單為食飽!生活係一種享受, 過程好重要, 只要你懂得, 生活係美好嘅, Life is beautiful :) 但享受唔一定洗好多錢, 今日嘅晚餐我用咗唔洗$100蚊,就包括香草煎羊架同一杯House Wine (2006年 Cabernet Sauvignon, Robert Mondavi 嘅Private Selections), 既好味又簡單, 依種就係人人都可以享受嘅『生活』!





Wednesday, November 19, 2008

又係咖哩

今晚我用左屋企嘅剩餘物資, 蜀米芯, 啡蘑菇同蕃茄煮左個懶人快餐﹣咖哩雜菜飯做晚餐。咖哩推介 



Monday, November 17, 2008

蜜糖芥末雞翼

今日有D心煩煩煩煩煩啊!
食得甜D, 會唔會開心番呢, 用蜜糖整雞翼+芥末刺激味覺神經, 另加香草蘑菇意粉,今晚食得好飽飽飽飽飽呀!一個人係山谷講嘢有回音音音音音呀!



Sunday, November 16, 2008

快速糯米飯

按「本經逢源」,糯米益氣補脾肺係溫養胃腸嘅好穀類。糯米咁有益今晚一於試下煮糯米飯做晚餐,多得姻伯母教我用電飯煲快速煮糯米飯,只需20分鐘美味嘅糯米飯就煮好啦!要個糯米飯唔好咁淋就要加D粘米,咁樣口感好好多。以後可以煮多D糯米飯嚟治木蝨啦, hahaha :)

小提示:
  1. 糯米與粘米嘅比例 = 1 : 0.2(可按個人喜好更改)
  2. 水嘅份量同煮法跟平日煮飯一樣, 注意: 糯米係唔洗浸嘅, 洗下就煮得。
  3. 量水後可加少少鹽調味
  4. 唔想臘腸太油,材料可預先蒸5分鐘,去油後才放飯面。另一懶人好方法:先用熱水洗下D臘腸,咁就無咁肥啦。
  5. 差不多飯好就將材料平放在飯面,飯好後焗多一陣。加上蔥粒同花生就有得食啦!係唔係勁簡單呢。快D煮個暖粒粒嘅糯米飯迎接依個寒冬嘅來臨!




Saturday, November 15, 2008

蛋糕堂@Coup Kitchen

白衣天使 (Angel Blanc)
================
「白衣天使」採用法國製造的白乳酪芝士為主要食材,含豐富維生素與乳脂肪,再加上一層士多啤梨果凍,清新口味,盡在不言中。
From Coup Kitchen

第一次上蛋糕堂好緊張呀,笨手笨腳,忙咗2個鐘頭個BB出世啦!

個蛋糕係唔係好靚呢?依個係亞 Sir 嘅作品緊靚啦!

至於我做果個就...hehehe...唧得好醜怪,同亞Sir果個差好遠,即係有好大嘅進步空間!今日好開心呀, 可以同家姐們分享一個咁美味嘅蛋糕 :)

Monday, November 03, 2008

So good 炒粒粒

是日晚餐
=======

1) So Good 炒粒粒 ... 餸飯之選
2) 冬茹甘荀蓮藕湯
3) "朋友仔"自家製Tiramisu ... 好好味!